Si Boru Tumbaga

1.
Topik-topik ni pinggan,
Binahen tu para-para,
Adong ma na saingan,
Na margoar si Tombaga.

Boru ni na sumurung,
Jala boru ni raja,
Partompa na mamunjung,
Na ganjang jambulanna.

Rimpur jari-jarina,
Togos nang pamatangna,
Pangeal ni gontingna,
Soada anianna.

Goar ni natorasna,
Ima Raja Ompu Gulasa,
Sian tano Suga-suga,
Dolok ni Tano Bakkara.

Disi ma ingananna,
Huta hatubuanna,
Di tano ni ompuna,
Jala tano ni amana.

Tano Suga-suga i,
Diingani Raja Horja;
Raja Ompu Gulasa i,
Tardok do i raja na mora.

2
Godang dohot ringgitna,
Torop do nang horbona,
Lombuna nang hodana,
Dohot hadumaonna.

Marluga ma Simamora,
Marluga marsada-sada,
Tutu do nian na mora,
Alai anakna ma soada.

Na punu do ibana,
Mate tuan baruna,
Ndang tumadingkon anak,
Holan dua do boruna.

Boru ni Ompu Gulasa,
Sidua sabutuha,
Sihahaan si Tombaga,
Si Buntulan anggina.

Pamaheon ni boruna,
Sada mas di hambirangna,
Alai so ada ibotona,
Ndang mar-mas di siamunna.

Mago ni si Tombaga,
Na so adong ibotona,
Aut adong ma ibotona,
Mas dohot di siamunna.

Marpingkir ma si Tombaga,
Nang si Buntulan anggina,
Mangkuling ma nasida,
Mandok hata tu amana.

Ai marbabo namarbaju,
Ba mangula doli-doli,
Amang na sumuan ahu,
Ua laho damang mangoli !

3
Dung dibege natorasna,
Hata ni siubeonna,
Dialusi ma tangkas,
Didok ma tu nasida.

Na marunggali lombu,
Laho tu pudi ruma,
Mangoli ahu nimmu,
Dagingku nungga matua.

Jolo sampulu pitu,
Jumadi sampulu ualu,
Mangoli ahu nimmu,
Nungga sabur dohot ubanhu.

Ise be olo tu ahu,
Pamatang naung matua,
Ninna Ompu Gulasa,
Mangalusi boruna.

Ianggo i ale amang,
Amang na sumuan ahu,
Adong do sibahen hata,
Ima bao domu-domu.

Mangalap manaruhon,
Ulaon ni domu-domu,
Pangoli ni naung matua,
Pagodang damang sinamotmu.

Huhut ma usungonmu,
Dorma sipanogu-nogu,
Mandasdas sian jabu,
Manogihon laho tu toru.

Topik-topik ni pinggan,
Binaen tu para-para,
Mandok i do si Tombaga,
Marsahit ma Ompu Gulasa.

4
Ianggo sahit na i,
Ima parro hamateanna,
Mamipis butuhana,
Barobuni do goarna.

Diinum pe angka ubat,
So ada tarhilala,
Huhut do morong-orong,
Posa do pangkilalaanna.

Tingki di tonga arian,
Di jou ma si Tombaga,
Na paboahon sahitna,
Hansit ni pangkilalaanna.

Dung diboto nasida,
Tangis ma si Tombaga,
Na sumarihon amana,
Iboto na pe soada.

Adong pe paribotoanna,
Tubu ni amang udana,
Diingot ma i sogot,
Na so boi hasurutanna.

Sai ambal lagu ni jolma,
Na so dongan sarurutna,
Huhut tangis si Tombaga,
Morong-orong nang amana.

Tinangishon ni si Tombaga,
Siteanon do amana,
Ai nang pe adong ugasanna,
Uarisna nampunasa.

Dipingkir ma sasudena,
Pangalaho ni uarisna,
Na so mangharingkothon,
Parsahiton ni amana.

5
Niorongkon ni Ompu Gulasa,
Lam hansit pangkilalaanna,
Nungga masuk dohot sigurbak,
Tarida di angkulana.

Sipu-sipu huat-huat,
Mintop di haba-haba,
Ai digogo pe marubat,
So adong na tarhilala.

Habang sitinda ulok,
Ngiak-ngiak anak ni lali,
Marpingkir si Tombaga,
Marsuru jou pangubati.

Anggi, boru Buntulan,
Hatop pariban maringkati,
Manjou datu na sumurung,
I ma Raja Partungkot Bosi.

Ima datu na sumurung,
Na ummalo mangubati,
Anggiat adong labanta,
Malum sahit ni amanta.

Dung dibege si Buntulan,
Hata suru ni hahana,
Hehe ma antong ibana,
Disungkun ma si Tombaga.

Mardemban parnapuran,
Marisap ma partimbaho,
Hahang boru Tombaga,
Tu huta dia ahu laho ?

Doras do pardalan ni hoda,
Nanget do pardalan ni horbo,
Tu huta dia ahu laho,
Dalan pe so na huboto.

6
Nda bolat ni rosu,
Nonang padua-dua,
Laho ma anggikku,
Togihon donganmu borua.

Ia huta ni datu i,
Di Tano Lintong ni Huta,
Laho ma hamu tusi,
Rap ma hamu na dua.

Hatop ma hamu mardalan,
Unang ahu ngolngolan,
Ndang lilu iba mardalan,
Molo singungkun-sungkunan.

Pidong siruba-ruba,
Habang tu Silalahi,
Inang dohon tu borua,
Amang tu lahi-lahi.

Mardalan ma nasida,
Mardalan padua-dua,
Ianggo donganna i,
Ima dakdanak borua.

Pardalan ni si Buntulan,
Songon pardalan ni baoa,
Saroal marbaju-baju,
Segar di simajujungna.

Ulos ma di hambirangna,
Ba, tungkot di siamunna,
Unang diambat halak,
Dipajingar pambahenna.

Dung i por ma udan i,
Sian dolok ni Silalahi,
Dung ditongan dalan i,
Pajumpang dohot lahi-lahi.

7
Amang lahi-lahi,
Sian dia dalan nami
Laho manjou datu,
Mangubati amantahami.

Datu sijouon nami,
Ima Raja Partungkot bosi
Dingkan dia inganan na
Asa huboto hami.

Na marluga parsolu,
Solu parsidua-dua,
Sian siamun on ma da,
Dalan tu Lintong ni Huta.

Ai disi do diingani,
Raja Partungkot bosi,
Datu na sumurung,
Jala datu na lumobi.

Digogo ma mardalan,
Jadi sahat ma nasida,
Tu huta ni Partungkot bosi
Di luat Lintong ni Huta,

Didapot ma datu i,
Hundul do jolo ruma,
Sahat si Buntulan,
Dipahombar tu lambungna.

Marluga ma datu i,
Solu parsidua tali,
Hamu ale amang datu,
Beta hamu tu hutanami.

Asa hamu mambahen ubat
Di sahit ni amantahami,
Poso do nuaeng sahitna,
Asi ma roham di hami.

8
Didapot datu i,
Toho do mambarbar hudali,
Anggo di intean ni datu,
I ma siunang na manundati.

Sombangku da amang datu,
Beta ma tu hutanami,
Sai asi ma rohamu.
Mangubati amantahami.

Hamu do ninna datu,
Na ummalo mangubati,
Pandokmu di upamu,
Asal hipas amantahanmi.

Manang horbo manang mas,
Dohot ringgit tabilangi,
Saguru tu pandokmu,
Manang dia buaton nami.

Dung dibege datu i,
Hata janji tu ibana,
Pintor las ma nang rohana,
Mingot balga ni upana.

Na marluga solu,
Solu marlima lima,
Marhobas datu i,
Mardalan ma nasida.

Diboan ma taoarna,
Dibagasan guri-gurina.
Nunga pangkiahiaon,
Di uli sijaloonna,

Sipusuk ni bulu,
Pusuk ni arsam na tata,
Sahat ma antong nasida,
Tu huta ni Ompu Gulasa.

9
Dung diida si Tombaga,
Humalaput ma ibana,
Laho pahembang amak,
Dingkan jabu tonga-tonga,

Hundul ma datu i,
Dohot na tinogihonna,
Marsalin si Buntulan,
Gabe marpahean borua.

Dung diida datu i,
Marbuluk do taroktokna,
Ai dirimpu lahi-lahi,
Hape pungu holan borua.

Marhobas si Buntulan,
Pature ingkau nasida,
Dung masak sipanganon,
Jadi mangan ma nasida.

Dung sae marsipanganon.
Marnapuran ma nasida,
Maungkun ma disi,
Halak Siboru Tombaga.

Pusuk ni rugi-rugi
Tu pusuk ni antalada
Disungkun ma datu i
Taringot tu sahit ni amana.

Na marluga solu
Marluga marsiadu,
Sahit ni damang on,
Beha boi do ubatanmu?

Anggo boi ubatanmu
Jalo parhangkunganmu.
Manang sadia pandokmu,
Asa huboto lehononku!

10
Mangkuling ma datu i
Mangalusi si Tombaga
Siala sungkun sungkun i.
Pandokna songon on ma:

Jurangkat mandondoni,
Tula-tula manjombai.
Inang boru Tombaga.
Anggiat ada tua nami.

Sahit ni amanta on,
Angiat boi ubatan nami,
Malum bahenon ni ubat,
I ma na huboto hami!

Tapangido asi ni roha.
Sian Ompunta Mulajadi.
Ubat na huboto on.
Sahat diparbadiai.

Taho ma i amang datu,
Sai sahat ma i tutu,
Alai beha do rohamu,
Bege ma jolo hatangku.

Ale amang datu,
Unang bahen sialangalang,
Lao sumungkun sombaon,
Dohot pardebataon.

Asa tatilik ma nian.
Marhite manuk di ampang.
Anggiat laba manaem,
Malum sahit ni damang.

Boru Buntulan,
Jou amanta Silitonga,
Mangangkupi datu on,
Ai tumangkas binotona

11
Sian aek dalan ni solu
Sian tur dalan ni hoda,
Ai nunga sambor nipinta,
Na so adong on ibotonta.

Habang sitinda ulok,
Ngiak-ngiak anak ni lali,
Ummoto na barua,
Sai umbisuk lahi-lahi.

Marluga ma parsolu,
Marluga marsada-sada,
Manang dia didok datu,
Naeng diboto alusanna.

Mardalan si Buntulan,
Manjou mamlohon,
Amana Silitonga,
Huhut ma diarahon.

Amang Silitonga,
Beta hita tu lumban nami,
Disi nuaeng amanta datu,
Mangubati amantahami

Naeng hamu angkupna,
Donganna mangkatai,
Ai hami na borua,
Hamu do anak lahi-lahi.

Na marluga solu,
Marluga baen dalanku
Laho ma ho ito,
Ai dapong dape lolangku.

Songon ia ma i didok,
Amana silitonga,
So adong na diansuhon
Ringkot ni panjauonna.

12
Marjojor martordingan,
Songon tangga ni balatuk,
Ibana tangkas angina,
Boasa langkana so tur!?

Sian tur dalan ni hoda,
Sian aek dalan ni solu,
Ndang boi ho mandok lola,
Ise ma sijouongku

So ada hami lahi-lahi
Duo do holan na boru,
Umbahen hamu hujou,
Ala so ada ibotongku,

Sibahut na ni durung
Pora pora niusehon,
Nang pe songon i ringkotna.
Ndada olo parosehon.

Tung laho ma ho ito,
Hudok godang dope lolangku
Ndang pola ho ajaranku
Manang ise ma sijouonmu.

Marsak si buntulan
Mingot sahit ni amana.
Ala so adong jouonna,
Lahi-lahi mangadopisa.

Jadi diulahi ma mandok
Hata elehelekna
Tu amana silitonga
Anggiat melok rohana.

Tonggi tabo ale amang,
Songon aek ni holi-holi,
Ise ma na olo alapanku,
Haru hamu so mangoloi.

13
Na marluga solu.
Solu marsada-sada,
Sinamot ni damang i,
Laho hamu do nampunasa.

Nunga sambor nipini
Ndang adong anak ni amanta
Aut ulang ala ni i
Ndang pasombuonna hami loja.

Naung bangko ni adat,
Di jolma sibirong mata,
Molo so ada anakna,
Siteaonon pinungkana.

Manang sinamot ni angina,
Manang sinamot ni hahana,
Molo so ada anakna,
Uarisna nampunasa.

Hamu ndada uaris,
Tangkas tinodohon ni amanta.
Jadi ala ni i !
Ndang boi ho mandok lola.

Haru laho ma ho ito.
Unang dison be ho marhata,
Mabiar si Buntulan,
Jadi laho ma ibana.

Handis ni Barumun,
Sirohot ni Banua tonga,
Hata ni amana Silitonga i,
Ndada na tartaonsa.

Hata ni amana i,
Dipaboa tu hahana,
Tangis si Buntulan,
Marabur ilu sian matana.

14
Boasa tangis ho anggi,
Ninna Siboru Tombaga,
Huhut do marsuap-suap
Ilu sian simalolongna.

Mangukuling si Buntulan,
Paboahon binalungunna.
Tu hahana si Tombaga,
Naung huhut marsak rohana.

Aha ma so tangis iba,
Ai ndang olo amanta,
Hata i do hupaboa,
Gabe ahu hona laga.

Sinamot ni damang i
Laho ibana nampunasa:
Hape holan uli i,
Do huroha ni ongopna.

Habang ma haluang
Sian dolok ni Pagarbatu
Mangkuling si Buntulan
Dompak amanta Datu,

Beha amang datu,
Songon dia pardalanna,
Amanguda pe so olo,
Ibotongku pe so ada.

Ia tole parmanuhon,
Ise sialusi hata,
Iba on do na borua,
Ndang binoto pardalanna.

Huhut do morong-orong,
Posa sahit ni amanta,
So ada na maniop uluna,
So ada na manjama patna.

15
Tole ma parmanuhon,
Ise pature haseana,
Hansit ma na borua.
Molo so ada na baoa.

Ibotoniba so adong,
Ba ise sialusi hata,
Ba, unang tun jais nami do.
Tapungka ma siulaonta.

Tangan do tutu botohon,
Punsuna jari-jari,
Hahuaon ma i amang datu,
Hamu ma mangajar-ajari.

Tangkas ma paboa hamu,
Manang dia buaton nami;
Asa hupatupa hami,
Olat ni na huboto hami.

Tano ni huta Tinggi,
Tano ni Ompu Taradu,
Dung didok sisongon I,
Mangkuling ma amanta datu,

Ue boru ni rajanami,
Hamu nunga marsintuhu,
Molo patindang parmanuhon,
Patimak hasea na pitu.

Hasea na pitu i,
Paboa damang ma goarna,
Ninna Siboru Tombaga,
Asa diboto buatonna.

Golang-golang paiduana.
Mas do sihahaanna,
Patimak ma dohot bunti,
Nang dohot parasomanna.

16
I ma pandok ni datu i,
Tu Siboru Tombaga,
Jala pajojor muse,
Debanari haseana.

Buat ma bunga-bunga,
Patipak dohot baja;
Buat nang pinggan na hot,
Dohot ulos hajojahanna.

Dohot hujur na sindak,
Dohot pardupaanna,
Taringot hasea na pitu,
I ma pulung-pulunganna.

Nunga tonggi tabo,
Songon aek ni holi-holi,
Jou ma panintingi,
Dohot amanta panamboli.

Oh he ale amang datu,
Ba, ise ma si juongku
So adong na mangoloi,
Ninna si Tombaga mangalusi.

Ai husuru do anggikku,
Mulak ibana mangalapi;
Manjou damang Silitonga,
So na olo mangalusi.

Hamu do na asi roha,
Jala na giot basa;
Di siulaonta on,
Manang beha ma pardalanna.

Ai ulos lobu-lobu,
So ada dipulosi,
Disuru na manjou,
Ndang olo mangalusi.

17
Molo i ma hape inang,
Ndang labana diulahi,
Si Buntulan ma paningtingi,
Ba, hamu ma pamboli.

Ba, songon i ma molo boti,
Ninna si boru Buntulan,
Mangalusi datu i,
Raja Partungkot Bosi.

Songon i ma ajar muna,
Songon i ma huoloi,
Horas ma amanta on,
Sai dialusi tondi.

Nunga di ginjang panintipan,
Di toru pambarbaran,
Nunga pandokkon ni tondi,
Pangoloi ni sibaran.

Dua hami holan borua,
Ndang adong anak ni damang.
Dohot na so hea ni ula,
Nunga pinarsiajaran.

Ndang hea nian borua,
Mangadopi manuk di ampang,
Ba, ulaon nama i,
Asal ma horas damang.

Masisungkunan ma hita,
Asa marsintuhu siulaon,
Sumungkun Debata,
Dohot naga-naga ni sombaon.

Manuk di ampang on,
Sai torang ma on idaon,
Marboa-boa tu na uli,
Asa adong parharoanon.

18
Tano Aji-bata,
Tu tano Parpiloan,
Manumpak ma Debata,
Sai dioloi pangidoan.

Ipe hamu ale inang,
Masisungkunan ma hita,
Nunga tipak hasea na pitu,
Dohot buntibuntina.

Masisungkunan ma amang,
Hata maniar bahen hita,
Ninna Siboru Tombaga,
Dohot si Buntulan angina.

Naung sampulu pitu,
Jumadi sampulu ualu
Nunga tipak parmanuhon
Martonggo ma amanta datu.

Ale sumangot ni ompunami! Sumangot ni ompu-boru, sumangot ni ompu doli:
Paisada, paidua, paitolu, paiopat, pailima, paionom, na papitu parsadaan, sibaso na bolon.
Pangulubalang suan-suanan, debata idup marorot.
Ia nunga rade dison parmanuhon siaji nangka piring, nai boru sinomba ni poda inang sinumba ni parmanuhon.
Horas do Raja i, paboa ma dison!

Manat alu-alum,
Tangkas robo-robom,
Paboa hahipason,
Di sahit ni Raja on.

Diungkap sitapangi
Tarisa ma dengkena,
Diungkap ma ampang i,
Parose parturena.

19
Dung dibuat manuk i,
Jadi marhata ma nasida,
Di jaha-jahaani I,
i ma sipatorangonna.

Topik-topik ni pinggan.
Binaen tupara-para,
Marhata ma nasida,
Dipaboa ulpuhanna.

Beha amang datu,
Ninna Siboru Tombaga,
Unang da mauhom hamu,
Dok hamu do ulpuhanna.

Tangkas paboa hamu,
Manang dia ginoarna,
Parulian do na ro?
Asa binuat haroanna.

“Turtu” ninna anduhur,
Songgop di dangka-dangka,
Saguru tu pandokmu,
Manang sadia pe balgana.

Olo boti ma da, inang.
Hudok ma jaha-jahana,
Ninna amanta datu i,
Tu Siboru Tombaga.

Tano Sigompulon,
Tu tano Lobu-lobu,
Ianggo ulpuhan ni on,
Didokkon do manggallang lombu.

Paluon godang sabangunan,
Peleon sormagot ni ompu,
Manumpak ompunta Debata,
Sai leleng hita mangolu.

20
Manjangkit gompang batu,
Tu hau antahasi,
Asal pinasahat i amang datu,
Hipas do amantahami?

Songon i ma sungkun-sungkun,
Ni si boru Buntulan,
manungkun amanta datu,
manang na boi hangkungonna.

Tonggi na hona pijor,
Dohot pinggan harungguan,
Sandok horas amanta i,
Jalo ma pasu-pasuan.

Manumpak ma Debata,
Dioloi pangidoan,
Sahat patupaonta,
Las ni roha marharoan.

Umbege i boru Tombaga,
Las do nian rohana,
Ala ibana na borua,
Ndang pintor mangundukhon.

Ba, unang ho tarngongong,
Naeng sigop ma marharoan,
Ninna datu pangabang-abang,
Tu si boru buntulan.

Pahinsa pangalahom,
Unang ahu sai ngolngolan,
Inang boru Buntulan,
Dohot boru Tombaga.

Na marluga solu
Marluga marduadua
Ulpuhan mangan lombu.
I ma na huhasusa.

21
Ise manjou pargansi.
Ise ma manogu lombu.
So ada hami lahi-lahi.
Pungu do holan na boru.

Sahit ni amanta on.
Parpungu ni hinamagongku;
Tulus pe pingkiranku.
Dokdok anggo di pamanganku.

Nunga tu jolo tu pudi,
Songon pardalan ni horbo:
Ise ma manogu lombu,
Ise ma martonggo-tonggo.

Ahu na borua,
So sadia na huboto,
Aut na olo amanguda,
Nunga i martonggo-tonggo.

Dipaula so diida,
Dipaula so diboto,
Holan na marnida uli
Do nasida na gumogo.

Sinuru do manjou
So na olo mangalusi:
Nang pe iba na boru
Bang ingkon sinauti,

Topik-topik ni pinggan,
Binahen tu para-para
Ala soada ibotona,
Martonggo Siboru Tombaga,

Ditompihon do ulosna
Ditiop pinggan partonggoanna.
Martonggo ma ibana,
Laos dibege angka Raja.

22
Mulak do panjouna.
Di tinodohon ni amana,
Umbahen ibana martonggo.
Paboahon saritana

E, amang Raja,
Unang bahen ahu tu hata,
Ibotongku soadong,
Umbahen ahu marhata

Nungga landit porhot,
Gota ni simargala-gala
Nungga hansit ngotngot,
Posa sahit ni amanta

Ulpuhan mangan lombu,
I ma ninna parhorasanna,
Umbahen hu suru manjou
Halak damang Silitonga

So na olo mangalusi,
Gabe anggiku hona laga,
Sinamot ni damang on,
Laho nasida nampunasa.

Asa ditangihon na torop,
Ditangihon angka Raja.
Ndatung ahu na lupa,
Hupaboa pardalananna.

Dung didok hatana i,
Manortor Siboru Tombaga,
Utang na so tarjua,
Ro ilu sian matana

Ai manortor si Tombaga,
Dipuhung do tanganna,
Ndada pola mangurdot,
Tungki simanjujungna

23
Donda pangalahona.
Hurang hinsa pardalananna,
Naung margorak do huroha,
Di parmate ni amana.

Naung sampulu pitu,
Manjadi sampulu ualu,
Manortor si Tombaga,
Mate amana di jabu.

Maringkat do angina.
Naeng mangalu-alu,
Dihusiphon tu hahana,
Mate amana di jabu.

Tu jolo tu pudi,
Songon pardalan ni horbo,
Nang pe dihusiphon angina,
Dipaula so diboto.

Na marluga solu,
Marluga marsiadu,
Panggual pargonsi,
Hubuat jolo napuranku.

Manang ise namanortor,
Nangkok ahu jolo tu jabu,
Mambuat napuranku.
Asa adongdo panganonku.

Mardalan si Tombaga,
Nangkok ibana tu jabu;
Di dapot do amana,
Naung tangkas mate di jabu.

Diida dohot patna,
Nunga dingatngati asu,
Nang pe songoni parirna,
Sip ibana mardabu-dabu.

24
Hundul si Tombaga,
Mardemban marhusari,
Suman jolma na mangolu,
Amana i dibulusani.

Parugasananna i,
Tangkas ma disiga-sigati,
Jolo di hinsu pintu i,
Asa lomona manjamai.

Unang adong halak marmida.
Unang adong na manotnoti:
Dipapungu singgit mas,
Sude sian bagasan sondi.

Dionjat tu bagasan hirang,
Dibahen sirabun mandondoni;
Unang adong halak marnida,
Lehononna tu angina.

Marbisuk Siboru Tombaga.
Diboto pangalahona;
Siteanon do amana,
Ala soada ibotona.

Pur alogo hurling,
Masuak dangka ni baja,
Dihusiphon tu angina,
Unang di bege angka raja.

Tua jolo tu pudi,
Songon pangambe ni paronan;
Boru Buntulan,
Taruhon on tu pargadongan.

25
Si Boru Buntulan,
Na pintor lao hapogan;
Ditaruhon tu pargadongan,
Mambahen tu pananoman.

Topik-topik ni pinggan,
Binahen tu para-para;
Dung dibahen songoni,
Tangis ma Siboru Tombaga.

Umbege tangisna i,
Tarsonggot ma angka Raja:
Mansohot ma pargonsi,
Dipaso ula-ulana.

Maringkat datu i,
Diluahon parhankunganna,
Malua lombu i,
Dipalua angka raja

Naung pitu hali hansit,
Di halak Siboru Tombaga,
Nungga suda rugirugina,
Mate muse dohot amana.

Hinamago ni si Tombaga,
Dang adong tarandunghonsa
Di parmate ni amana,
Tamba hancit hinadangolna.

Dipambahen ni amana,
I ma amana Silitonga,
Jolma naso maruhum,
Na so sioli di jolma.

Na so olo marnarugi,
Holan uli ginopgopna,
Nanggo pala mangurupi,
Pasauthon ulhupanna.

26
Sian aek dalan ni solu,
Sian tur dalan ni hoda,
Hinamago ni si Tombaga,
Paima jolo hu paboa.

Dung mate Ompu Gulasa.
Ro ma angina Silitonga,
Lao manggulut sinamot,
Na lao siteanonna.

Asa songon i ma hape,
Roa ni deba jolma.
Molo so di ingot uhum,
Nang pet u sisolhotna.

Ia tu ulaon loja,
Dokdohan do rohana,
Ia manean uli,
Maringkat do ibana.

Si bulung ni bulu,
Si dangka ni antalada,
Sip ma ho jolo ito,
Ito boru Tombaga.

Ninna amana i,
Amana Silitonga,
Na girgiran di uli,
Barang i pasinohonna.

Ba aha ma di ahu,
Amang Silitonga,
Nuaeng ho ro tu jabu,
Nantuari ho so ro.

Nungga tonggi tabo;
Songon aek ni holi-holi,
Na hudok ale ito,
Adong ma da na hu usoi.

27
Nungga tonggi tabo,
Songon dai ni pora-pora.
Na huusoi ale ito,
Tardok ma on Raja na mora

Mas dohot ringgit na,
Nda lehet papunguonta?
Patudu ma tu ahu ito,
Asa ahu pajophonsa!

Oi ale daba amang,
Ninna Siboru Tombaga,
Mangalusi sungkun2,
Ni amana Silitonga.

Na marluga solu,
Solu maradu-adu,
Umbege hatami,
Tung longang do rohangku.

Habang si tinda ulok.
Sian parsonggopan ni lali,
Ringgit dohot mas.
Ndang hupasari-sari.

Damang na mate on do,
Nahuandungi hami,
Ringgit mas nidokmi,
Unang pausoi tu hami.

Laho manean sinamot i,
Maringkati ho tu jabu.
Nialapan ho amang,
So olo ho mangalusi datu.

Ndang na so olo ahu,
Hudok godang si ulaonku,
Unang sarita ahu,
Ianggo alani lolangku,

28
Habang si tinda ulok,
Sioksiok anak ni lali,
Sinamot ni dahahang i,
Ingkon lehon saonari.

Marlojong ma horbo.
Habang anak ni lali,
Molo so di lehon ho.
Ho bobohon dohot tali.

Marluga ma parsolu,
Solu parsada-sada.
Lagami ale amang,
Paboaonku i tu raja.

Ndada na hupangan,
Sinamot ni amanta.
Sombangku da amang,
Unang tu ahu ho marlaga.

Ramba na so tinoto,
Ndang huboto ulaonku,
Dibahen na so huboto,
Ndang huboto paboanku.

Molo manuntun ho marlaga,
Nda na lupa ho marboru?
Aut ro ma ho di ngolu ni amanta.
Nda tangkas i boto onmu?

Sibulung ni bulu:
Sidangka ni antalada.
Tung paboa ma tu ahu
Ito boru Tombaga.

Jurangkat mandondoni,
Tula-tula manjombai,
Tangkas do i diboto ho.
Ai ho do manigati.

29
Ringgit ni dahahang i,
Ingkon lehon saonari.
Molo so dilehon ho i.
Jabuon surbuon tu api.

Tutu do ndang diboto,
Siboru Tombaga ingananna.
Ai anggina si Buntulan do,
Na manabunihonsa.

Hau sian jolo sopo,
Dibahen tu pudi ruma.
Dibahen na so huboto,
Horas do au marsumpa.

Ndang adong huboto,
Ndang huida ingananna,
Sombangku da amang
Unang ho marlaga-laga.

Topik-topik ni pinggan,
Binahen tu para-para,
Dung so tarida ringgit i.
Tu beangan si Tombaga.

Ro ma pasi gadong,
Sian porlak sibun-buni.
Boru Buntulan,
Laho dainang martabuni.

Molo diida ho anon.
Dohot muse ho dirahuti;
Asa pahatop ma mardalan,
Lao ma ne ho martabuni.

Laho si buntulan,
Humatop maringkati,
Unang sanga diida,
Asa sanga martabuni.

30
Pat ni si Tombaga tu beangan,
Tangan na i dibobok tali,
Rohana so marhasonangan,
Luhutna di pasari-sari.

Habang ma ambaroba,
Mangangkat di atas batu,
Oh amang Silitonga,
Tanggal beangan sian pat hu.

Ia so ditanggal ho,
Ingkon hona sapatanghu,
Ai so adong huboto.
Tu ho hasalaanku.

Sinamot ni hahami,
Ndang haoraan au;
Pahumpuonmu sian toru,
Papungu dohot sian jabu.

Na so huboto i,
Unang i pausoi tu ahu,
Oh amang Silitonga,
Tanggal beangan sian pat hu,

Tangis Siboru Tombaga,
Mangandung ibana manungki,
Amana Silitonga,
Suda sinamot di tarui.

Tu beangan si Tombaga,
Si Buntulan pe martabuni.
Mangangguhi si Tombaga,
So adong na mangalusi.

Mata Ompu Gulasa,
Boruna di pukpuhi,
Sai dibagasan mara,
Nang pe laho martabuni.

31
Sian aek dalan ni solu,
Sian tur dalan ni hoda,
Mangandung si Tombaga,
Paboahon hi namagona.

Diparmate ni amana,
Na so ada ibotona,
Sinamot ni amana,
Dibuat amana Silitonga,

Marsiak bagi si Tombaga,
Ndang adong nahinongkopna,
Hinamago ni si Tombaga,
Na so ada tudosanna.

Si dua satutuha,
Aik anak ma i nian sada
Ndang songoni dangolna,
Dipambahen ni udana.

Sai gumogo ma baoa,
Mamboanhon i tu raja,
Umbahen uhum roha-roha,
Pambahenan ni udana.

Adat nahurang ture,
Dijolma si birong mata,
Holan anak do panean,
Di sinamot ni amana.

Anggo boru so rajumon
Marduahon pinungkana,
Umbahen so boi raja,
Mangampini si Tombaga.

Soluk ma amangudana,
Maringanan di jabuna,
Marsapata si Tombaga,
Tu amana Silitonga.

32
Na so siol i di boru.
Sahat ro di pinomparna.
Luhut do hita jolma,
Mamursikhon ibana.

Na so uhum na so paho,
Binahenna tu si Tombaga,
Ala so tarida ringgit,
Tu beangan si Tombaga.

Dung tar barita i,
Tu pinggol ni angka Raja.
Marlojongi ma nasida,
Paluahon si Tombaga

Dung suda sinamot i,
Dibuat amana Silitonga.
Dipalaho si Tombaga,
Manang tudia topotonna.

Songon lampak ni pinang,
Longkang dung mahiang,
Siboru Tombaga i,
Laho tu harangan na bidang.

Mandapothon si Buntulan,
Na monggop di liang-liang,
Disi ma nasida na dua,
Tangis martutungkian.

So tampil be tu huta,
Liang nama ingannanna.
Dipingkir hinamagona,
Na so ada tudosanna.

Si Tombaga sihahaan,
Si Buntulon Sianggian,
Hinamabo ni nasida,
Lompo do turi-turian.

33
Dihatahon na jumolo,
Ditorsahon na dipudian.
Diaonlaon ni ari,
Songon turi-turian.

Adong ma sada halak,
Isi ni luat parbotihan.
Laho marburu hije,
Tu harangan na bidang.

Toho dapot langkana,
Jolma di liangliang,
Di rimpu begu so jolma,
Bodil di tangan hambirang.

Naeng ma bodilhononna.
Dompak jolma na diliang,
Hape pintor marsuara,
Angguk na marsirainan.

Jadi roma baoa i,
Na sian Parbotihan,
Dipatangkas ma diida,
Dua boru masiabingan.

Dipajonok ma diida,
Asa tangkas masisiean,
Pajumpang ma nasida,
Dapot ma sipangkulingan.

Mangkuling ma baoa i,
Na sian Parbotihan,
Boan na ginjang na bolon,
Goarna Aman Tornaginjang.

Na tinitip sanggar,
Bahen huruhuruan,
Jolo siningkun marga,
Asa binoto partuturan.

34
Inang boru-boru,
Dia marga ni dainang,
Tama do na manise,
Lehet masisungkunan.

Na mangkuling imbo,
Sian atas ni sidulang,
Atik beha na mariboto,
Manang marboru ni tulang.

Na marluga solu,
Marluga marsiadu;
Amang doli-doli,
Ndada huboto margakku.

Tu jolo tu pudi,
Songon pardalan ni horbo,
Dainang so na hutanda,
Damang pe so na huboto.

Unang longang ho amang,
Ndatung ahu na mamorso,
Ba, laos timbang roham,
Hami pe mian dison do.

Pusuk niramba poso,
Sipusuk ni arsam natata,
Tanda ni na so mamorso,
Horas do ahu nang marsumpa.

Ia molo songon i,
Boru ni Raja nami,
Songon hodong songon pahou,
Songon i do ho, songon i ahu.

Margam pe so diboto ho,
Ahu pe ndang huboto margakku;
Dia ma dohononku tu ho,
Pariban nama di rohangku.

35
Ro ahu tu Toba on,
Sian jau harorongku,
Sian ladang do ahu ro,
Jabu pe so ada ingananku.

Songon i ma i didok,
Paserephon rohana;
Laho mambuat roha,
Ni Siboru Tombaga.

Na marluga solu,
Solu marsada-sada;
Pajumpang hita inonge,
Ba beha pangalohana ?

Sada dua tolu,
Songon nidok ni pamilangi,
Boru ni Raja nami,
Donganku ho marpadi-padi.

Hinorhon ni sitaonon,
Pajumpang hita be;
Asi roha ni Tuhan,
Anggiat ma hita gabe.

Olo tubuan laklak,
Jala tubuan singkoru,
Olo tubuan anak,
Jala tubuan boru.

Olo tubuan laklak,
Di dolok ni Purbatua;
Olo tubuan anak,
Dongan sarimatua.

Poltak ma bulan i,
Dohot bintang sihapu-hapu;
Ndang boi ahu di ho,
Ai so ada panggulmitangku.

36
Damang pe so hutanda,
So na huboto margakku;
Ahu pe boru ni Toba,
Ba hamu pe anak ni jau.

Hita on na mian di ladang,
Ndada na domu di jabu;
Beha ma partupana.
Hita marjabu-jabu.

Ianggo siala i,
Ndada tu hata bahenonku,
Asa tung hot hata i,
Gana dia tolononku.

Ima sidohononku,
Hata siingotonmu.
Paboa na so oseonku,
Padan sibahenonmu.

Nungga balintang pagabe,
Tumandanghon sitadoan,
Nungga arinta gabe,
Molo masipaoloan.

Topik-topik ni pinggan,
Binahen tu para-para,
Molo domu hita doli,
Ba, ise sipadomu hata.

Nungga tonggi tabo,
Songon dai ni pora-pora.
Boru ni Raja nami,
Ba, ise ma sijuonta.

Inanta pe soada,
Sae pambahenan ni rohanta,
Dua do hita di son,
Jala patolu anggitta.

37
Tombak do ingananta on,
Ndang adong jolma ni ida,
Domu pe hita dison,
Holan panjou ni tonditta.

Hudapot pe hamu dison,
Ndada jolo huida,
Tung i ma partupana,
Pandokkon ni parsorionta.

Dung songon i be hata i,
Marpadan ma nasida,
Marhata sigabe-gabe,
Masiommaan ma nasida.

Topik-topik ni pinggan,
Binahen tu para-para,
Taringot tu si Tombaga,
Songon i ma pardalananna.

Halak Siboru Tombaga,
Sahat tu huta ma nasida,
Ia dung sahat tu huta,
Digondangi do nasida.

Aman Tornaginjang,
Harajaan ni si Tombaga,
Anggi ni Aman Tornaginjang,
Ima Aman Dolok Maria.

Si Buntulan angina,
Gabe di Aman Dolok Maria,
Songon i ma didok barita i,
Gabe mamora do nasida.

Ai boi do dialap,
Ringgit mas na tinanomna,
Jolo margelleng do nasida,
Asa dibuat sibunianna.

38
Laos dipatorang-torang,
Diparmate ni amana,
Dohot na hansit ditaon,
Di pambahen ni udana.

Ditumpak Debata,
Maulibulung do nasida,
Gabe tubuan anak,
Angkupna sarimatua.

Ujung ni si Tombaga,
Songon i ma pardalananna,
Ndatung na huida,
Ahu pe na umbege hata.

Marende na jumolo,
Songon i ma pardalanna,
Hurang lobi sian i,
Ndang huboto baritana.

Dia ma poda sian i;
Di angka Tuan-tuan panjaha,
Ganup ma marpinkir,
Na tumbuk tu rohana.

Na dapot hupingkir,
Ima na hupaboa,
Dijaha tuan pamasa,
Songon na tarsurat di toru on ma:

Na todos do hape,
Halak Siboru Tombaga,
Mangulahon binoto na,
Nang pasangaphon amana.

Ndang adong dihabiari,
Manang dia pe marana,
Naung lompo do dipingkir,
Pambahen ni amanguda na

39
Olat ni na masa i,
Marpingkir ma angka raja,
Di langka ni siteanon,
Dohot ma boru nampunasa.

Marguna ma hape.
Partinaonan ni si Tombaga,
Gabe mambahen turgas,
Tu angka raja-raja.

Sai adong hata ingoton,
Barita ni si Tombaga,
Na lompo do turi-turian,
Di jolma sibirong mata.

Songon i ma na huboto,
Hamu tuan-tuan panjaha,
Ditumpak Debata ma
Sai horas hita sudena.

Horas !

About MauliateMaruliPurba

RAP MARSIAJAR BLOG

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s