SIPANGANON :
1. Tudu-tudu ni Sipanganon
2. Dengke Simudurudur,
3. Marune dohot
4. Paulak Une.

ISTILAH DI ULAON UNJUK
A. SINAMOT
• SINAMOT : ima BOLI manang TUHOR ni Boru sipamulion i.
• Hepeng manang Pinahan pe songon namasa nahinan si jaloon ni Ama ni Boru muli ma i.
• Parboru manjalo Sinamot – Paranak manjalo Ulos Herbang.
• Ndang tarmasuk tu Sinamot na ni jalo ni Hasuhuton Parboru ima: Parjambaran tu:
o Si Jalo Bara,
o Pariban,
o Tulang ni Boru Muli,
o Simandokkon dohot Parjambar na gok sihataan di jabu.
o Sude Parjambaran i, diluar ni Sinamot do i, jala ima sipasahaton ni Paranak tu si jalo Jambar nagok ditingki Ulaon Pasahat Sinamot/Marhata Sinamot.
• Dimulana, Dorbia, Sere, Tano dohot angka Ogung dohot Ringgit do dihatahon gabe Sinamot ni Boru. Alai, ditingki naparpudi, nang pe Hepeng nama dihatahon gabe Sinamot, alai anggo isi ni panghataion tong do didok : piga Lombu, piga Horbo dst
..
SIJALO BARA
• Aka Pinahan do dihatai Sinamot ni Boru, Sijalo Bara ma borhat tu huta ni Paranak laho maningkir Lobu (Bara) inganan ni Dorbia i.
• Dung sahat ro di tingki naung nibuhul ni Paranak tu haroro ni Suhut Parboru Maningkir Lobu, borhat ma Sijalo Bara dohot manang piga donganna tu huta ni Paranak.
• Mangarade Sipanganon namarsaudara do Suhut Paranak manjakkon haroro ni Suhut Parboru, jala dung sidung nasida mangan dipungka ma manghatai taringot tu:

C. RINGGIT
• Ringgit (Sinamot ni Boru) ima najinalo ni Parboru sian Paranak laho bahenon ni Parboru gabe jambar tu Tulang ni Boru Muli, dohot Suhi ni Ampang na Opat.
D. DORBIA
• Dung sidung Acara manjalo Sinamot di Jabu, hehe ma Parboru sian hundulanna laho maningkir Lobu inganan ni Dorbia nagabe Sinamot i. Dung lengkap do sude bilangan ni Dorbia i diungkap ma bahal ni Lobu i jala diolat Parboru ma Dorbia i tu hutana. Ia dihuta ni Parboru adong do nadigoar siungkap bahal laho pamasukkon dorbia i tu lobu, mangarancang asa aman. Adong do parjambaran tu nasida siungkap bahal.

PAMARAI
• Ima sian Suhut Paranak, namanjalo Tumpak sian angka Sisolhotna, molo tumpak ringgit dipamasuk ma tu Puro, molo tumpak dorbia dipamasuk ma tu Lobu. Ibana do melapor tu Suhut Sihabolonan taringot tu Jumlah ni Ringgit dohot Dorbia sian Tumpak ni angka Sisolhot.
• Diharoro ni Suhut Parboru (Rombongan Sijalo Bara) ba Pamarai do mangadopi nasida dohot pasaehon sude sinamot naung nihataan di namarhata Sinamot i.

F. PANJUHUTI :
• Tinasak do sipata didok goarna, ima sipasahaton ni Paranak laho sipanganon ditingki Ulaon Unjuk. Sadari andorang so mata ni ulaon i, nunga sahat i, Dorbia (Horbo. Lombu. Pinahan Lobu) dohot Boras tu bagas ni Parboru rap dohot uduran ni angka Boru ni Paranak, laho paturehon i dimata ni ulaon (mangalompa) rap dohot Boru ni Parboru.
• Pedoman ni PANJUHUTI dohot DENGKE
o Ia di hita Par-Silindung molo Panjuhuti (Taragu manang Tinasak) napinasahat ni Paranak tu Parboru “HORBO” di namarunjuk, LOMBU TUNGGAL do pasahaton ni Parboru tu Paranak jala SILA do digoarii molo dung masak manang DENGKE.
o DENGKE do goar ni Juhut nanilehon ni Parboru tu Paranaki, ima ULAK ni Taragu dohot sulang-sulang napinasahat ni Paranaki tu Hula-Hulana Parborui. Jadi siani dapot do tarida, nasa naung pinasahat tu Hula-Hula ndang adong be sijaloon ni Paranak siani, ai ma dilehon Parboru tu nasida Dengke sibagion nasida songon ulak ni Panjuhuti i. (Taragu i)
• Namargoar ni Horbo i ma sibagion ni Parboru gabe Parjambaran Juhut tu angka sisolhotna jala namargoar ni Lombu i ma sibagion ni Paranak marguru tu ruhut parjambaran namasa di nasida be.
• Babi/Pinahan Lobu do Panjuhuti dipatupa Paranak ulakna lehonon ni Parboru ma Dengke Simudur-udur tu Paranak i. Dengke i do sibagion ni Paranak tu Dongan Tubuna, Boruna, jala Lompan ma goarna dipasahat tu Hula-hula dohot Tulangna. Alai, ala naung martondong do Parboru dohot Paranak, di parbagian ni namargoari/tudu-tudu ni sipanganoni, ditingki so dibagi dope parjambarani dohonon ni Parboru ma tu Paranak songon on:
Di hamu Parboruonnami, ala huida jala huboto hami do na digokkon hamu Hula-Hulamuna Dongannamisahundulan, songoni nang Dongantubumu Berenami, dohot Borumu Ibaberenami, ba dison hupasahat hami ma parjambaran di nasida jala hamu ma napaturehon hombar tu haroro nasida dohot namasa dihamu. Dipasahat ma sian namargoar i tu Paranak songon nanidok diginjangi jala ima goarna: JAMBAR TARIPAR.

Ndang adong klaim ni Paranak di napinasahat i tu nasida, ai Piring ni Parboru do i tu nasida..

G. DENGKE SIMUDUR-UDUR
• Ikan Mas manang Ihan namansai balga, sahat ma didok ala ni balgana Ihan nalobangon, (molo di partopi laut: ala ndang sai dapot Ikan Mas, ditonahon ma tu Pardengke Laut:: Dengke Jompol manang Dengke Gabu ) sipasahaton ni Parboru tu Paranak, disamping ni dengke dohot ingkau rata (sayur) donganna laho sipanganon ni horong Paranak di mata ni Unjuk i.

H. UNJUK
• Pataridahon/mangunjuk : Tinasak nadipatupa ni Paranak pasangaphon Hula-Hulana Parboru jala songon dia do balga ni dengke dohot sipanganon napinatupa ni Parboru tu horong Paranak i.

SINAMOT SITOMBOL
• Ditingki on ndang songon naung pinatorang diginjang i be anggo pangantusion di Sinamot i. Nunga sude masuk tu sinamot i, Jambar Hepeng, Namosok, d.n.a. gabe Hula-Hula Parhobas ni Paranak di Ulaon Unjuk, ripe sonang nama Paranak, manortori di alaman ni Parboru Hula-Hulana i.
• Asa tarida istilah Mangan Tuhor ni Boru, undenggan ma Ulaon i : Taruhon Jual.

ULOS TONDI = ULOS MULA GABE
Ndang apala sude luat patupahon Ulaon napasahat Ulos Tondi manangUlos Mula Gabe.
Alai, ala ulaon nadenggan do ulaon on dipanghilalaan ni godang halak Batak gabe hampir sude ma marlas niroha laho mangulahonsa.
Las ma roha antong huhut mandok mauliate tu Amanta Debata molo dung sahat dioloi Debata Pardenggan BasaI tangiang ni Parboru ditingki napamulihon Borunai asa
:
Tubuan Laklak, Tubuan Singkoru, tubu sanggar diparsopoan
asa tubuan Anak tubuan Boru, jengkar-jengkar diparngoluan.

Dung marumur kandungani berkisar 7 tu 8 bulan digoari mai naung manggora pamuro. Lapatanna; nunga las roha ni angka tondong dohot dongan manungkun manang andigan ma tingkina marharoan, hasosorang ni dakdanaki

Dung tarbege tu Parboru naung paima haroan Boruna, mansai las situtu roha nasida huhut mandok mauliate tu Debata Pardenggan BasaI, migor ma dibuhul tingki laho manaruhon Ulos Tondi-Ulos Mula Gabe, di gokkon ma manang piga ripe haha-anggina dohot Boruna mandongani nasida tu ulaon nanaeng patupaon nasidai Manaruhon Ulos Mula Gabe.

Dipaboa Parboru ma tu Pihak ni Helana maksud dohot tingki haroro nasida.
Mangarade ma Pihak ni Helanai, manggokkon manang piga Haha-Anggina, Boruna nang dohot Dongan Sahuta mandongani nasida manjalo haroro ni Hula-Hula nasidai.

Pihak Paranak : paradehon Sipanganon na marhadohoan (martudu-tudu) laho manjanghon haroro ni Hula-Hula mandapothon nasida.

Pihak Parboru :: Mamboan Dengke Simudur-udur/Upa-Upa dohot Ulos Herbang
Dung hundul sude napungui, Paranak dohot Parboru, dipungka nasida ma manghatai:

PARBORU : Dihamu Lae nang di Ibotonami, songoni ma nang disude hamu tondongnami napungu dibagas namarampang namarjualon, namarsangap namartua sigonggom pangisina, unang pola songon nasungkun-sungkun rohamu diharoronami on mandapothon hamu, ai mansai las situtu rohanami huhut mandok mauliate tu Amanta Debata Pardenggan Basai, dinasahat barita tu hami naung manggora Pamuro di Borunami.
Dung hubege hami baritai migor hapogan ma hami naeng ro mandapothon hamu, nibuhul ma tingki jala huida hami tutu nunga paima haroan Borunami.
I do haroronami nuaeng mandapothon Borunami dohot Helanami dison, laho pasahathon Ulos Mulagabe (Ulos Tondi) tu Borunami jala dibagasan ni i asa rap martangiang hita tu adopan ni Debata Parasi Rohai, manghamauliatehon di basa-basaNa tu Borunami nang tu hita saluhutna.
PARANAK: Mauliate ma parjolo dohononnami tu Amanta Debata Pardenggan Basai, jala mauliate ma dihamu saluhutna Hula-Hulanami, dohot Pariban nang sude ma hamu tahe na ro mandapothon hami tu Bagas namarampang namarjual sigonggom pangisinaon.
Marsomba ma hami Rajanami, sampulu jari pasampulusada simanjujung tu hamu Hula-Hulanami., jala dohononnami ma: Hula-Hula naburju ma hamu antong Rajanami, di namarsangkap dope hami naeng ro mandapothon hamu paboahon naung manggora pamuro di Parumaennami, Borumu, nunga parjolo hamu mandodo nadirohanamii.
Tung manang so piga pe hami Rajanami namanjalo haroromuna on marpanganju ma hamu: Botima hatanami Rajanami.
SUHUT PARBORU : Antong disiala las nirohanta mandok mauliate tu Tuhantai, mangarade ma Borunami dohot Helanami asa ro hami pasahathon Ulos Tondi/Ulps Mulagabe on, ai ma sai dipasimpan-simpan Inanta Ulos on paimahon boa-boamuna.
Dipatupa ma indahan dipinggan pasu jala diginjang ni indahan i dipeakhon sada Dengke (biasana: Ikan Mas nadiarsik) dibahen dohot parburian dohot aek sitio-tio dohot pinggan marisi boras si pir ni tondi.
Pelaksanaanna: Didokma: parjolo : Martangiang ma hita
(denggan ma molo mangulahon ulaon na pasahat Ulos Tondi jolo martangiang)
Dipasahat ma dengke upa-upa tu jolo ni Boruna:
On ma Inang nang dihamu Amang Hela Upa-Upa dihamu, upa-upa ni badan upa-upa ni Tondi, asa hipas-hipas jala horas hamu napaimahon basa–basa ni Tuhanta nanaeng pasahatonNa dihamu, dao ma nasa abat-abat, sai tiar ma parsaulian di hamu tujoloanon
dibuat ma Ulosi, didokma :
Huuloshon ma Ulos Tondi, Ulos mula gabe on tu hamu Inang dohot hamu Amang Hela, dohot pangidoan di tangiangnami tu Amanta Debata Parasi rohaI, asa dipaherbang Tuhanta Tanganna Nabadiai mamasu-masu hamu di hagabeon di tubu ni Anak dohot tubu ni Boru jala dipadao ma nasa abat-abat, hipas ma nanaeng ro hipas nang hamu Natorasna nanidapotna, nang hita saluhutna.
Sai unang lupa hamu martangiang tu Amanta Debata Parasi RohaI asa Ibana namandongani hamu tongtong. Horas ma Dainang songoni nang hamu Amang Hela.
Dijomput muse boras sipir ni tondi, jala jolo di bahen tu sambubuna, dibahen muse tu sambubu ni boruna 3x huhut didok: Pir ma tondim da inang paima haroan nanaeng jaloonmu sian Tuhanta Pardenggan Basai, dao ma nasa abat-abat, sai Tuhanta ma namandongani hamu dinapaimahon haroan on.
Dijomput muse dibahen tu sambubu ni Helana huhut didok hatana: Pir ma tondimu Amang, hipas hipas ma hamu jala dungo dinapaimahon Basa-Basa ni Tuhanta dihamu, unang lupa hamu martangiang tu Tuhanta mangido Asi ni RohaNa, sai dilehon dihamu gogo dohot bisuk sai sisada tahi sisada roha ma hamu dohot Borunghon.
Sahat ma angka nauli nadenggan silas ni roha dihamu sian Tuhanta.
Disulangi ma Borunai mar 3X dilehon minum aek sitiotio, dungi mulak ma nasida tu hundulanna.

Suhut Paranak:
Rajanami, Hula-Hulanami, mauliate ma di naung dipasahat hamu Ulos Tondi-Ulos Mula Gabe tu Borumu, Parumaennami, siala ni i Rajanami andorang so manghatai hita mangido hami nian asa jolo marsipanganon hita
Migor ma dipataru angka pinggan, parbasuan, indahan dohot angka lan naasing laho panganon nasida.
1. Pihak ni Hela pasahat tudu-tudu ni sipanganon tu jolo ni hula-hulana.
2. Pihak Parboru pasahat dengke simudur-udur tu horong/Natoras ni Helana
3. Martangiang sian Pihak ni Hela.
4. Marsipanganon
5. Paranak do anggo namambagi Parjambaran Juhut tu horong hula-hula alai anggo tu tandok ni hula-hulanai dipamasuk ma Osang + ihur-ihur
6. Andorang so manghatai jolo dipasahat Hela/Borunai ma Piso-piso tu Simatuana dohot Pasituak Natonggi.tu angka na ro.
7. Mandok hata pasu-pasu dohot hata sidenggan-denggan horong hula-hula.
8. Mangampu horong Paranak + Hela/Boru
9. Tangiang panutup sian hula-hula dung jolo marende.

MAMUNGKA PARTONDONGON
Asa unang gabe basis ni pangantusionta di angka Ulaon Adat DI PANGOLION NI ANAK/PAMULIHON BORU naung somal taulahon di tano pangarantoan on, denggan do ra molo pinatorang saotik dison pardalan ni Ulaon sisongoni sian namamungka sahat ro di namangujungi Ulaon Adat di napangolihon Anak/Pamulihon Boru di mulana i, di hita angka par-Silindung:
Adat do Ugari, Sinihathon ni Mulajadi –
Siradotan manipat ari, Salaon di siulubalang ari
Jongjong Adat sitongka do i tabaon, Peak pe Adat sitongka do i langkaan
Adat na so jadi mose, Uhum na so jadi muba.

Denggan ma bulu godang denggan baen hitehite,
molo adong anak magodang/ boru magodang denggan ma asa hot ripe
Asa tubuan laklak tubuan singkoru, tubu sanggar di parsopoan
Asa tubu di nasida Anak dohot Boru, asa jengjar-jengkar di parngoluan

Molo dung dihalomohon sada Anak Baoa naeng mardongan saripe dohot sada namarbaju, dipaboa ma tu Natorasna jala molo lomo do roha ni Natorasna naeng martondong tu Parboru marhite Boru tinodo ni Anaknai, migor do dihapogani manjou Pamoruonna asa laho mangjubungi Parborui.
Manungkun tu Parboru; biasana parjolo ma nasida manghubungi apala Boru ni Parborui paboahon sangkap nasidai.

Dung manghatai Boru ni Paranak tu Boru ni Parborui, migor do ulahonon ni Boru ni Parborui laho pabotohon sangkap napinasahat ni Boru ni Paranaki tu Hula-Hulana, Natoras ni Boru nasinagkap ni Paranali nanaeng parumaenna .
Molo dioloi Hula-Hulana do sangkap ni Paranaki (biasana nunga dipaboa Borunai tu nasida sangkap ni si Doli) migor ma dihubungi nasida Boru ni Paranaki paboahon pangoloion ni Hula-Hulana manjalo sangkap ni Paranak laho manopot Borunai.
Dibuhul ma tingki laho naek Pande lapatanna tingki haroro ni utusan ni Paranak mandapothon Parboru tu Jabu ni Parborui laho patuahon panghataion i.

Ro ma rombongan ni Paranak: Dongan Tubu, Boru, Dongan Sahuta ni Paranak, tu bagas ni Parboru, songon namamungka panghataion di sangkap ni Anak nasida naeng mardongan saripe dohot Boru ni Parboru tinopot nasida i. ima nidokna Naek Pande. Jala namanguluhon panghataion disi digoari ma Pande Hata.
Manghatai ma Pande Hata sian Paranak dohot Pande Hata sian Parboru manaringoti sangkap ni anak nasida nanaeng parajahon boru nasida (mardongan saripe). Molo dung tingkos jala masioloan nasida taringot ni sangkap ni anakhon nasida, dipatua ma hata ni naposo i jala ditingkion didok ma Patua Hata. Ndang i dope sautna, na ingkon ro dope Pande Hata ni Paranak nalobi lengkap tu bagas ni Parboru, laho manghatai Sinamot (Marhusip-husip)

Najolo didok do goarna Marhata Sinamot manang Manghatai sinamot.
Ditingki on, songon naung pinatorang diginjang i nunga dipasada sasudena ima: Napatua Hata dohot Namarhusip jala ndang adong pola be sipingkiran, ai ma sidung hian sude dihatai Suhut Paranak dohot Suhut Parboru, holan namanambor-nambori nama anggo Ulaon Marhusip.

Di Ulaon Namarhata Sinamot (nuaeng Marhusip) terjadi ketegangan, saut manang na so saut partondongon i, haputusanna dinamanghatai sinamot i do..
Borhat ma Horong Paranak diboan nasida ma Parbue sitonggi-tonggi, sisigaton ni Parboru. Dung sahat tu Bagas ni Parboru, dipasahat ma i laho sisigatan ni Parboru.
Jolo disigati Pihak Parboru do i nabinoan ni Paranaki asa disuru nasida hundul.
Ndang mamboan Sipanganon namartudu-tudu Paranak tu Bagas ni Parboru ditingki Naek Pande songon namasa di Jakarta on Marhata Sinamot (Marhusip)

Alai anggo Pihak Parboru napaimahon haroro ni Paranaki, paradehon sipanganon ma nasida laho manamuei Pihak Paranak na ro. Paradeon ni Parboru do di si sipanganon dohot juhut namarsaudara, lapatanna sipanganon namartudu-tudu, patuduhon na so jagal rambingan manang jagal pasar. Di cara sisongon on ma tarida timbo ni budaya ni Bangso Batak, na tongtong pasangaphon tamue manang tondong na ro mandapothon nasida. Tung so hum do roha ni Halak Batak molo ro tondongna sian huta naasing, mulak sian bagasna so jolo mangan ingkon do tamueanna.. Hasomalan nadenggan situtu do i di ngolu ni hita Halak Batak.

Dung tipak sude sipanganon di jolo ni napungui, dipeakhon Parboru ma Tudu-tudu ni sipanganoni di tonga-tonga ni napungu i, napaboahon tu sude na pungu i na so Jagal Rambingan diparade Parboru manjakhon haroro nasida.
Ditingki mangan nasida mandok hata ma sahalak horong ni Parboru ima hata sidumaduma mangan jala didok ma:

horong ni Parboru : Hamu tondongnami, na ro tu huta on,
didok umpama :
Marbau tanduk, marbau holi-holi, godang sibutongbutong,
otik si pir ni tondi Tung so sadia pe sipanganon i, pamurnas ma tu daging, saudara tu bohi,
Horas ma namanganhon, Horas ma napatupahon.
Sitiktik ma sigompa. Golang-golang pangarahutna, songoni pe sipanganon natupa sai godang ma pinasuna.
horong ni Paranak : I ma tutu Rajanami, Raja ni Hula-Hula, Gabe ma namala, gabe ma nanilean Godang do sipanganon na nileanmunai, ba godang ma dihamu pinasuna tu joloan ni ari on.
Botima
Parboru : I ma tutu, di hamu Tondongnami, Sahat ma nauli ro ma najagar tu hita on saluhutna.
Sude ma rap mandok : I ma tutu.

Parboru : Dung sidung mangan, huhut sidung namasisisean Paranak dohot Parboru taringot tu sipanganon dohot haroro ni Paranak sahat ma tu pokok panghataion ima angka di hata sinamot dohot angka parjambaran dohot lan na asing namardomu tu sangkap ni haroro nasida.
Manghatai ma hita hamu Raja ni Parboruon. Nunga nihatahon nangkining di hata sidumaduma mangani, taringot di sipanganon naung tapangani, di jabu namarampang namarjual, namarsangap namartua on, sigonggom pangisina. dst. dst.
PARANAK : Olo Rajanami, nunga hupangan hami sipanganoni nihabutongkon dst
laos ditambai muse Ia tambor bonana, rugun ma nang dohot punsuna, ia gabe, mamora hulahulana, sai songoni ma nang dohot Boruna.
Songoni ma seterusna panghataion ni Paranak dohot Parboru masialusan songon nasomal (ida hata di parhusipon dohot angka hata di ulaon naasing melengkapi panghataion dst)
Parboru : dung didok angka hata nauli dohot umpama didok ma:
Siala haroromuna tu Bagas on, ai patumpol nuaeng dison: Pat ni Gaja tu Pat ni Hora, Anak ni Raja, Pahompu ni namora. Tontu adong ma sitaringotan diadong roha ni pananginangi na liat na lolo.: Hata nauli hata nadenggan, sibegeon ni pinggol, sipeopon ni roha, botima hatanami
PARANAK : dihatahon ma maksud ni anakna tu boru ni Parboru jala didok ma asa manghatai sinamot
“ ……”
Parboru : Ba nunga binege hatamuna Paranak, godang ma pasahat hamu sinamoti, dst.
Dungi masiigilan ma nasida di godang ni sinamoti, upa ni Suhut sihabolonanan, sijaloon ni Ama ni Borui. Jala tung nania do lelengna dihatai nasida asa marune tu na denggan.
Dungi dihatai ma muse, Jambar ni si Jalo Bara, Tulang, Simandokkon, Pariban, Todoan (Panghaei + Bola Tambirik) Upa ni Ompu dohot Anak Manjae.+ Tintin Marangkup.
Dungi dipasahat Paranak ma Bohi ni Sinamot tu Suhut Sihabolonan dohot Patujolo ni Jambar tu pangalambungi, dungi diganupi ma napungui dohot Pasituak Natonggi/Ingot-Ingot.
PARANAK : Dung singkop sude, dipasahat ma hatana marhite angka umpama mangido ma’af molo adong hata natarlobi dst. ……
PARBORU : Andigan ma hami ro maningkir lobu
Sian on ma ro hata “SI JALO BARA” ai najolo ndang hepeng dihatai Tuhor ni Boru, angka Horbo, Lombu, Hoda dohot angka Sere, Mas, dna. Ima umbahen na ro Parboru (SI JALO BARA) tu huta ni Paranak laho maningkir Bara/Lobu, paposhon roha ni Parboru di Sinamoti naung nioloan nasida. Alai sai adong do sian dos ni roha ima napasadahon na marhata sinamot dohot maningkir Lobu, jala molo diulahon sisongon on.
sibagi dua ma Paranak dohot Parboru di harugian na marsipanganoni.

Dung simpul sude panghataioni dohot denggan: Dibuat Suhut Parboru ma Parindahanan naimbaru; dipamasuk ma sude tudu-tudu ni sipanganoni tu parindahanani, dipanuti denggan, siboanon ni Paranaki tu hutana.

Haha manang Anggi ni Hasuhuton Parborui ma SIJALO BARA:

Borhat ma ibana dohot manang piga donganna tu Huta ni Paranak maningkir Bara/Lobu dohot isina.. Diolat ma Pinahani tu huta ni Parboru, adong ma dihuta ni Parboru naginoar “Si Ungkap Bahal” asa pamasuk Pinahani. Horbo, Lombu, Hoda dohot lan Pinahan naasing dipamasuk ma tu Bara ima nigoaran tingki i: SINAMOT NA GOK

Haha-Anggi ni Hasuhuton Paranak ma PAMARAI :, na pabarahon Pinahan nagabe Sinamot, ai molo ro tumpak sian Dongan Sabutuhana angka Dorbia do, Horbo, Lombu, ba ibana ma manjalo huhut pabarahon, paima ro si Jalo Bara ni Parboru maningkir Bara i.

Denggan ma tutu namamungka partondongon namasa ditingkion, ima naung langsung masipajonohan Pihak Paranak dohot Pihak Parboru manaringoti sangkap nasida nanaeng martondongi, gabe boi ma dohonon ndang sai sude be umbotosa molo so mardomu hata pangidoan ni Paranak dohot Parboru (biasana ala ni Sinamot) gabe ndang sai dapot be begeon endei :
mulak mulak di tangga do anak ni na so marhepeng.
Boasa mulak-mulak di tangga??

Di angka Ompunta Naparjoloi, songoni nang ditingki on di sebagian huta di Bona ni Pasogit, tong dope diulahon nasida namamungka partondongoni songon naung pinatorang di ginjangi, jala songon on ma cara pelaksanaanna.

AHA DO PANJUHUTI
Ia PANJUHUTI ima goar ni Horbo, Lombu manang Pinahan Lobu nabinoan ni Paranak tu Huta ni Parboru ditingki UNJUK. Molo Unjuk Bolon , Horbo Tunggal nabolon ma diharihiri Paranak, Molo unjuk nasomal do Pinahan Lobu do, jala ingkon jumolo sadari sahat tu huta ni Parboru, tarmasuk boras silompaon dongan ni panjuhuti i, unang dihadihaon roha ni Parborui.

Dung dilompa Horboi, Juhut ni Horboi digoari ma “TARAGU” manang “TINASAK” taida ma pandohanna: Ia Juhut nasantanggoi, ima Taragu ni Boru nahualap hami gabe Parumaennami
Jadi MARUNJUK ima naputuduhon Juhut ni Boru nabinoan ni Paranak pasangaphon Hula-Hulana, Parborui, jadi ndang dung tarmasuk nahinan Panjuhuti tu godang ni Sinamot.
Parboru manjalo Panjuhuti (Tudu-Tudu ni Sipanganon) balosna sian Parboru tu Paranak ima Dengke Simudur-udur, dohot Dengke naasing muse donganna laho sipanganon ni horong Paranak.. Sinamot balosna ima Ulos Herbang, Panjuhuti balosna ima Dengke Simudur-udur.

Alai lam tamba taon ndang apala tuhor be lapatan ni napamuli Boru alai hira boi ma dohonon namasileanan: Parboru manjalo Sinamot jala Paranak manjalo Ulos Herbang dohot hata pasu-pasuan Dihata ni Gokkon dohot Jou-Jou pe jotjot do dapot idaon hata namandok: Mangan indahan na las dohot minum aek sitio-tio huhut manjalo dohot pasahathon Adat na hombar tu ulaon i.

PESTA UNJUK (ALAP JUAL)
Dung sahat diari nabinuhul ni Paranak dohot Parboru diari Pamasu-masuon Parbagason di Bagas Gareja songonon ma pardalan ni ulaon:

A. SIBUHABUHAI
PARANAK.
Sogot manogoti diparnangkok ni mata ni ari, borhat ma rombongan ni Paranak dohot Pangoli sian hutana laho mandapothon Parboru dihuta ni Parboru.
Siboanon ni Paranak ima Namargoar (Pinahan Lobu) ndang pola balga i, dibagasan Ampang doi dibahen, jala biasana mangisi Ampang i, Boru ni Suhut Paranak. On ma na digoari si Hunti Ampang jala sijalo Ulos si Hunti Ampang ma nasida.
Diboan Pangoli ma Bunga Tangan laos disi ma dipasada Bunga sipasahaton ni Boru Muli tu Anak Pangoli.
Dung sahat dihuta/dialaman ni Parboru i, dijolo ma Ampang i jala ihutma Pangoli dipudina, dungi Suhut Paranak diihuthon angka dongan sauduran

PARBORU.
Nunga mangarade Parboru, dibagas dohot sude angka Dongan Tubuna dohot angka Boruna. Sipatupaon nasida pe manjalo Paranak ima DengkeSimudur-udur nunga diparade hian, songoni nang boras sipir ni tondi dIatas pinggan.

Andorang so ro dope Paranak diupa nasida ma jolo Boruna naneng Pamulioni, jala Namboruna mandonganii di kamar penganten huhut mangalehon angka poda.

Pelaksanaan ni Ulaon na Mar-Sibuhabuhai:
Manggora ma sahalak sian Parboru manggokkon Rombongan ni Paranak asa masuk nasida tubagas, jala hira-hira manang napiga langkanai sian pintu masuk migor ma disampakkon sahalak Ina sian Parboru Boras si Pir ni Tondii tu rombongan ni Paranak 3X huhut didok Horas, Horas, Horas tong 3X songon panampakhon ni borasi.
Dijalo Boru Muli ma Anak Pangoli dipintu: Dilehon Pangoli ma Bunga Tangan i tu Boru Muli jala disemathon Boru Muli ma Bunga di Jas ni Pangoli (ma adong hian ingananna)
Masuk ma Pangoli dohot Boru Muli dohot angka pandongani tu ruangan khusus/kamar paima borhat tu Gareja.

Ia Ampang nabinoan ni Paranak dipeakhon ma jolo ditonga-tonga ni Punguan i, jala dung sidung masijalangan, jongjong ma Parboru dohot Paranak masiadop-adopan.
Disigati Parboru ma Ampang namarisi Tudu-Tudu ni Sipanganon dohot sitonggi-tonggi, jala dipasahat ma tu Pamoruon asa dipature, dungi dipersilahkan ma jolo Paranak hundul.

Parboru : Beha Raja ni Boru, mamereng tu tingki hita asa tapungka ma nian ulaonta
Paranak : Nauli Rajanami; huhut digora Boruna asa diparade Tudu-Tudu ni Sipanganoni

PARANAK: Pasahat tudu-tudu ni Sipanganon.
Dihamu Rajanami, Hula-Hulanami, parjolo ma hita mandok mauliate tu Amanta Debata Pardenggan Basai ai ala asi dohot holong ni rohaNa dapot dihita nuaeng ari nauli ari nadenggan on disangkap ni rohanta laho mangudurhon anakhonta tu jolo ni Debata di Bagas JoroNai asa laho manjalo pasu-pasu parbagason.
Siala ni sangkaptai Rajanami, dison ro do hami tu adopanmu Hula-Hulanami pasahathon tudu-tudu ni sipanganon Sibuha-buhai dohot pangidoannami tuadopan ni Debata Pardenggan Basai asa mambuhai parhorason panggabean ma on Rajanami dihita saluhutna tarlobi di Anakhonta nanaeng mamungka parbagasoni sadarion. Tung songon on dope naboi tarpatupa hami Rajanami, las ma rohamuna manjalo. Botima.

PARBORU
Dihita napunguon Amanta Raja dohot Inanta Soripada Suhut Parboru: dison nunga tajalo tudu-tudu ni sipanganon sibuha-buhai sian Pamoruonta, ba tung dijolo ni Hasuhuton Bolon pe nuaeng tudu-tudu ni sipanganon on naung rap manjalo mahita disi. Botima da.
Huhut migor ro ma Boru ni Parboru mamboan Dengke sipasahaton nasida tu Paranak.

PARBORU Pasahat Dengke:
Di hamu Raja ni Borunami, nunga dipasahat hamu tu hami Hula-Hulamu tudu-tudu ni sipanganon sibuha-buhai, dison hupasahat hami ma tu hamu Dengke simudur-udur, Dengke sitio, Dengke Sahat, dohot pangidoan tu Tuhanta Pardenggan Basai asa mudur-udur ma antong parhorason panggabeani dihita tujoloanon, Tio ma nang parngoluonta dohot pancamotani, sai sahat ma angka nasininta ni rohanta tarlobi di Anakhonta nanaeng manjalo pasu-pasu parbagason on. Songoni ma jolo hatanami.
Catatan : Dung pe dipasahat hula-hula Dengke simudur-uduri asa masijalangan.

Martangiang sian Paranak. Dung Amen laos didok hata ni sipanganon.
Dung sidung marsipanganon: dijou Parborui ma Penganten asa rap pungu martangiang laho borhat tu Gareja. Martangiang laho borhat: sian Parboru. Borhat tu Gareja, parjolo ma haruar sian bagas Penganten, baru ma udur angka naasing

B. DI GAREJA:
Dung sidung Ulaon Pamasu-masuon di Gareja : mandok hata ma sian Paranak dohot Parboru:
mandok mauliate laos manggokkon na ro i, asa rap udur tu bagas parpestaan.

C. DIINGANAN PARPESTAAN

1. ULAON NI PROTOKOL
Dung sahat sude Rombongan: (Penganten, Suhut Paranak, Suhut Parboru) tu Bagas Parpestaan, migor ma mangarade parjongjongna be di Pintu Masuk tu Gedung i, asa tipak sude masuk molo dung ro gora sian Protokol.

Protokol Parboru: Dihamu Pamoruonnami, huparade hami di hamu inganan disabola hambirang molo masuk hita tu bagasan gedungon, songoni ma boa-boanami tu hamu

Protokol Paranak: Mauliate ma Rajanami; laos ditariashon ma:
songoni ma dihita na mar-Dongan Tubu Paranak, Boru, Bere, Dongan Sahuta, Aleale, nunga dipasahat Hulahulanta dihita inganan: disabola hambirang dung masuk tu gedung on, masuk ma hita tabuat be ma ingananta..

Protokol Parboru: Dihamu Borunami; ida hamu ma jolo manang naung sude sahat Suhut Sihabolonan nadua dohot Penganten. Molo dung sahat nasida paboa hamuma……(dialusi Boru: dibahen Jari Jempol paboa naung siap)

Protokol:
1. Di Amanta Raja dohot Inanta Soripada naung masuk tubagasan Gedung on, ala naeng masuk ma rombongan ni Penganten, songon namanomu-nomu nasida, dohot hormat, mangido hami diharadeonmu asa rap jongjopng hita.
2. Dihamu Parmusiknami, asa mangarade ma hamu mambahen musik panomunomuon.
3. Di hamu Rombongan ni Penganten: Masuk ma hamu
4. Manungkun Boru nabertugas manang naung lengkap Hula-Hula dohot Tulang
5. di jou ma Suhut Sihabolonan laho manjalo haroro ni Hulahula dohot Tulang
6. Boru sijalo Siuk dohot si Pir ni Tondi nabinoan ni Hula-Hula, mangarade hian.
7. Dihamu nahuparsangapi hami Raja ni Hula-Hula dohot Tulangnami: (didok Marga ni angka Hula-Hula dohot Tulang) sahali manjanghon ma hami diharoromuna, dijolo ma Hula-Hulanami Tulang ni Boru Muli ihut ma Tulang …… Hula-Hula ni Anak.
8. Musik : manjanghon hula-hula dohot Tulang.
9. Manjalo haroro ni Hula-Hula: Dijolo Suhut Sihabolonan, Paidua, dst. sambil mundur sahat dijolo ni podium. migor ma jongjong suhut dibarisan parsiamun mangadophon hulahula dihambirangna ma angka suhut martinodohon mangihuthon tingkatanna be
Siap ma Boru manjalo dengke dohot sipir ni tondi nabinoan ni hulahula

Protokol : Horas ma di hamu sude Hula-Hulanami, nunga huparade hami inganan di hamu disabola siamunnami, hundul ma hamu Rajanami.
(Borunami: Patuduhon hamu inganan/hundulan ni sude hulahulanta)
Didok tu Protokol Paranak : Amangboru
ala naung masuk do sude hulahulanami, hupasahat hami ma tu hamu acara on.

Protokol Paranak : Mauliate ma Rajanami;
(tata cara ni Paranak manggora huhut manjalo hulahula nasida dos do songon tata cara ni Parboru; alai parjongjong ni Suhut Paranak dihambirang ma asa ditingki na
namanjalang hulahulai denggan ma mardalan mandapothon inganan di nasida naung pinarade ni Paranak

2. MAMUNGKA ULAON UNJUK :

Protokol Parboru : Manungkun Paranak asa mamungka ulaon
Protokol Paranak : Manggora Suhut Sihabolonan laho pasahat tudu-tudu ni sipanganon
Protokol Parboru : Manggora Suhut Sihabolonan + Dongan Tubu manjalo tudu-tudu ni sipanganon
3. PASAHAT TUDU-TUDU NI SIPANGANON
Hata ni Paranak : Dihamu Raja ni Hulahulanami, parjolo ma hami mandok mauliate tu Tuhanta Pardenggan Basai namangalehon ari nauli ari las ni roha on di hita ima naung manjalo pasu-pasu parbagason anakhonta sadarion dibagas joro ni Tuhantai; dison ro do hami tuadopanmu Hula-hulanami, pasahathon tudu-tudu ni sipanganon tu hamu, tudutudu ni sipanganon di las ni rohanta sadarion, jala hatana Rajanami dohononnami ma:
Godang sibutong-butong, otik sipir ni tondi, tung songon on dope naboi hupatrupa hami sipanganon on Rajanami sai pamurnas ma on tu daging saudara tu bohi, horas ma hamu Hula-hulanami namanjalo horas ma nang hami Borumu napatupahon. Botima .
(ndang pola jolo masijalangan)

4. PASAHAT DENGKE SIMUDUR-UDUR
Hata ni Parboru : Di hamu Raja ni Borunami: Nunga dipasahat hamu tu hami tudutudu ni sipanganon di ulaonta on, dison ro do hami pasahathon tu hamu Dengke Simudurudur, Dengke sitio, dengke sahat, dohot tangiangnami mangido tu Tuhanta Parasirohai, asa mudurudur ma antong parhorason panggabeani jaloonmu tujoloanon, dengke sitio ma on: sai tio ma nang angka hangoluan dohot pansamotani jala dengke sahat ma on sai sahat ma sude angka nasininta ni rohanta lehonon ni Tuhanta hombar tu lomo ni rohaNa. Las ma rohamu manjalo, botima. (baru ma masijalangan)

Protokol Parboru: Dihita namardongan tubu, Boru, Bere, dongan sahuta, aleale tarlobi ma dihamu
Raja ni Hulahulanami, dison nunga dipasahat Pamoruonta Tudu-tudu ni Sipanganon tu hita,
molo tung dijolo ni hasuhuton pe hasahatanna naung rap manjalo ma hita disi. Botima

Protokol Paranak : Songoni ma dihita dst. (boa-boa ni Dengke tu pihak nasida)
Protokol Parboru : Amang boru: asa tapungka marsipanganon, ala hamu do napatupa sipanganon on laos hamu ma namamboanhon tangiang mangan tu adopan ni Tuhanta

Protokol Paranak : Martangiang – Amen – didok ma hata sidumaduma mangan
dihamu hulahulanami dohot disude Amanta raja dohot Inanta soripada, sude hita napunguon,
hata ni sipanganon dohononnami ma: sitiktik ma sigompa golang-golang pangaruhutna, tung
songoni dope sipanganoni natarpatupa hami, sai godang ma pinasuna, marjobut ma hita.

Rajanami, Hulahulanami: ro ma hami pasahathon sulangsulang natabo tu hamu rade ma hamu
manjalo, jala hata ni sulangsulang Rajanami laos sian on ma dohononanmi:
husulangi hami ma hamu Rajanami dohot sulangsulang natabo on, sulang-sulang pangidoan di
hagabean di tubu ni Anak tubu ni Boru ala naung hualap hami Borumu gabe Parumaennami,
las ma rohamu manjalo, botima.

5. MARBAGI TUDU-TUDU NI SIPANGANON: PARJAMBARAN JUHUT

Protokol Parboru : Amangboru, mangan ma namangan dope, manghatai ma hita:
Nunga dipasahat hamu tu hami tudutudu ni sipanganon on, namanungkun ma hami Amangboru taringot tu tudutudu ni sipanganon naung pinasahatmuna on., beha ma hatana taringot tu son.

Protokol Paranak: Horas ma jala gabe Rajanami; taringot ni tudutudu ni sipanganon naung
hupasahat hami tu hamu, ba songon dia ma pangatur ni Rajai. Sidapot solup ma hami, botima

Protokol Parboru : Andorang so di seat raut parjolo ma di seat hata; Ala dison do huida hami Hula-Hulamu, Haha Parhundulnami, songoni nang Dongantubumu, Berenami, dohot Borumu, Ibaberenami, dison pasahatonnami ma Parjambaran Taripar tu nasida :
2 soit, satonga somba-somba, parsanggulan parhambirang. , hamu ma namangatur parjambarani tu nasida.

Protokol Paranak:. Songon naung hudok hami i do Rajanami, sidapot solup ma hami, songon dia ma dipasahat hamu tu hami las ma rohanami manjalo. .Mauliate ma

Dung dipasahat Parboru Jambar Taripar tu Paranak mangido tingki ma Paranak:

Protokol Paranak : Rajanami, mangido hami tu hamu, asa hupangke hami jolo tingkion laho mangido tumpak sian angka namanghaholongi hami, beha Rajanami

Protokol Parboru :. Nauli Amangboru, ulahon hamu ma

Protokol Paranak: Dihamu dongantubunami, Dongan sahuta, aleale, lumobi ma dihamu Borunami
dohot Berenami, napangolihon Anak do hita sadarion: songon nidok ni umpama: sisolisoli uhum siadapari gogo, marade hami dison laho manjalo tumpak, panungkolionmu dipangolion ni anakta on, ro ma hamu godang godang ma pasahat hamu.
Songoni ma di hamu nang horong ni “Tulangnami” songon nidok ni umpama ma dohononnami: Dangka do dupang, Amak do rere, Amang do Tulang, Anak do ia Bere’
Molo tung naeng manumpahi hamu Rajanami dinapangolihon Anak Beremuna on, las ma rohanami manjalo. Mauliate ma parjolo. (langsung dipangido Musik)

Ditingki namanjalo tumpak Paranak, sambil lalu maedalan ma parbagi ni Parjambaran Juhut.

Protokol Parboru : Dihita namardongan tubu, Borunami, ro ma hamu tu son asa rap hita paturehon parjambaran on. (dos ma tahinta parjolo ma tapasahat jambar ni Hulahulanta) – dialusi dongan: tubu : (denggan ma i tutu)

About MauliateMaruliPurba

RAP MARSIAJAR BLOG

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s